Elî
Kaşifî bi merasîmek hat bibîranîn
Dema Nu/Holanda
Bi minasebeta 18 saliya şehîdbûna Elî Kaşifî
ku di sala 1990an de li bajarê Konyayê bi hevkariya hêzên
emnî yên Tirkiyeyê ji aliyê terorîstên rejima hov û dagirker
ya Iranê ve hatibû şehîdkirin, li bajarê Almere yê
Holandayê merasîmek hat lidarxistin. Di merasîmê de behsa
mêrxasî û tekoşeriya Elî Kaşifî hat kirin.
Merasîma
ku ji aliyê malbata Elî Kaşifî ve hatibû amadekirin,
bi deqîqeyek rêzgirtin bo yadên şehîdên Kurdistanê
hat despêkirin. Di despêka merasîmê de sînevîzyonek ku
ji wêneyên Elî Kaşifî û dîmenên çiya, dol û deverên
Kurdistanê pêk hatibû, hat nişandan. Merasîm, herçendî
ji aliyê malbatê ve hatibû amadekirin jî, birêvebirên
sazî û dezgehên Kurdistanî yen wek Sekreterê Gistî yê
Partiya Sosyalîsta Kurdistan-PSK Mesût Tek, Serokê KOMKAR
Holanda Sîdar Bîngolî, Berpirsê Partiya Demokrata Kurdistana
Iran-PDKIran yê li Norvecê Abdullah Hîcap, Berpirsê Partiya
Demokrata Kurdistan-PDK yê li Holanda Omer Zavîte û gelek
dost, heval û hevsengerên Elî Kaşifî jî beşdarê
merasimê bûn û wî bibîranîn.
Merasîm, ji aliyê hevsengerê Kaşifî
Muzafer Begzade ve hat birêvebirin. Begzade, di axaftina
vekirina merasimê de bal kişand li ser merxasî û
jiyana pêşmergeyatiyê ya şehîd Kaşifî.
Axaftina ewil, ji aliyê birayê Elî Kaşifî Kerim Kaşifî
ku ew jî di wextê xwe de pêsmerge bûye, ve hat kirin.
Kerim Kaşifî, destnîşan kir ku Elî Kaşifî
hê di ciwantiya xwe de di dema xwendekariyê de beşdarê
nav refên şoreşger û azadixwazên Kurdistanî
bû û heta dawiya jiyana xwe jî, bêrawestan tekoşîna
azadî û rizgariya gelê Kurd domand û weha got: “Elî Kaşifî,
demeke li bajaran wek qadirek siyasî û pişt re jî
wek pêşmergeyek egîd ji bo azadiya gelê xwe xebat
kir. Ew, ji ber mêrxasî û tekoşeriya xwe di temeneke
ciwan de di sala 1981an de wek Endamê Komîteya Navendî
yê Partiya Demokrata Kurdistana Iran hat hilbijartin.”
Piştre, yek ji hevsengerê wî Cîhangîr îsmaîlzade
axaftinek kir û di axaftina xwe de behsa jiyana zaroktî,
xwendekarî û ya pêşmergeyatîya Elî kir.
Sekreterê
Gistî yê Partiya Sosyalîsta Kurdistan-PSK Mesût Tek ku
bi qasî çend salan li çiyayên Kurdistanê bi şehîd
Elî re bihev re mane, li ser mêrxasî, şexsiyet û
taybetmendiyên şehîd Elî axaftinek kir. Mesût Tek,
diyar kir ku piştî derbeya leşkerî ya li Tirkiyeyê,
ew derbasê Rojhilatê Kurdistanê bûne û liwir ji aliyê
qadir û pêşmergeyên PDKIranê ve ku şehîd Elî
jî di nav wan de bû, hatine pêşwazîkirin û demek
dirêj mil dane milên hev û di heman sengerê de li dijî
dijminê hov û dagirker alaya tekosînê bilind kirin.
Mesût Tek, bi berdewamî bal kisand li ser
hin taybetmendiyên Elî Kaşifî û weha got: “Elî hertim
di nav gel de bû û tuwext xwe ji nav gel durnexist. Kek
Elî digot ‘her qadirek siyasî divê herweha şerker
be jî’. Elî herî kêm bi qasî wexta xwe ya wezifeya hîzbayetiyê,
ji xwendin û nivîsandine re wext vediqetandin û carna
pirtûk ji destê wî nediket. Ev xususiyetên kek Elî tu
car serê min derneketine û ta îro ji min re bûne wek ders.”
Di berdewamiya merasimê de peyama PDKê
ji aliyê Omer Zavîte ve hat pêşkêşkirin. Zavîte,
di axaftina xwe de bal kişand li ser êriş û
terora dewletên dagirker ku heta nuha li dijî gelê Kurd
hatiye bikaranîn û diyar kir ku armanca van dewletên dagirker
ya bi van kiryarên kirêt û terorîstî ew e ku temenê rejima
xwe ya hov û dagirker dirêjtir bikin.
Berpirsê Partiya Demokrata Kurdistana Iran-PDKIran
yê li Norvecê Abdullah Hîcap jî di axaftina xwe de bal
kişand li ser giringiya yekîtî û hevkariya navbera
hêz û rêxistinên Kurdistanî û destnişan kir ku dijminên
gelê Kurd, di van demên dawî de carek din ketine nav hewldanê
ku bi dek û komployan carek din mafên gelê Kurd bê binpêkirin
û wendakirin.
Herweha, yek ji hevsengerê wî Celîl Gadanî
axaftinek kir. Axaftina dawî ji aliyê kurê Elî Kaşifî
şoreş Kaşifî axaftinek kir.
Merasîm, bi xwendina sirûda neteweyî “Ey
Raqib” bi dawî bû.