Zarukên Elî bi wan gotinan babê xwe bi bîr tînin:
Fikir, rê û rêbazên Elî wek hindek gotinên dîrokî têne ber guhê me û ti caran nayêne bîrkirin û herdem berdevamin.
Ew gotinên dîrokî bo Elî bibûne mînak:
Hêvîdarin ku xort û gencên me van gotinan têxin guhê xwe
Xwendin nebî kes naçe pêş
Peyda dibin pir derd û êş
Eger hûn nebin yek, Hûn ê herin yek bi yek
Eger hûn bibin yek, Dijmin ê herin yek bi yek
(Cegerxwîn)
Xuşk û birayên min î qehrxwarî û gelê min î zorlêkirî!
Êdî dijminahîya hev nekin û pişta xwe bidin hev. Li hember dijminê zordest û zalim derkevin, xwe belaş nefiroşin dijmina. Dijminê gelê Kurd pir in, zordest û bê şêfqet in.
Sembola serkeftina her gel û netewekê hevgirtin û yekbûn e, piştgiriya gel a gişî ye.
Hetanî hûn hev negirin, hûnê bi ser nekevin.
Her gelê ku yekîtî û tebayiya wî nebe; ewê hertim di bin destê dijmin de be.
Hev bigirin û tu carî pişta hev bernedin.
Şîret û wesiyeta min ewe, ku bila zarokên we bixwînin. Ji ber ku tu tiştê me ji yê gelên din ne kêmtir e, bi tenê xwendin. Bixwînin ji bo ku hûn ji karwanê gelan paşve nemînin û her xwendin çeka kujek (kuştine) a dijminan e.
Piştrast bin û bizanin ger tebayî, yekbûn û xwandina we baş be, hûnê pir baş bi ser dijminê xwe jî bikevin. Çênabe bi kuştina min û bi kuştina bira û pismamên min çavê we bitirse. Hetanî hûn bigihîjin hêvî û meramên xwe; divê hê jî pir kesên din yên mîna me xwe di vê rêyê de gorî bikin.
Piştrast im, piştî me pir kesên din jî her dê bi xapandin û durûtiyê ji holê werin rakirin.
Piştrast im ku pir kesên din dê piştî me jî bikevin xapandina Eceman de; dê ji me zanatir û hêjatir jî bin, lêbelê hêvîdar im kuştina me ji dilsozên gelê Kurd re bibe pend û îbret.
Kurdistan mala her Kurdekî ye. Her wekî ku di malê de, endamên malê her kî çi karî dizane wî dispêrin wî. Îdî mafê tu kesî tune ku hesûdiyê jê bike. Kurdistan jî her ew mal e. Ger we zanî ku kesek li vê malê dikare karekî bike, dev jê berdin bila bike.
(Qazî Mihemed)
Pîroz be bîranîna şehîd Elî u herwiha 70 salîya hizba wî.
Zarukên Elî
16-08 -2015