ن: شه‌هاب
20 ساڵ له‌مه‌وبه‌ر، له 15ی ئاگۆستی 1990دا ده‌ستی ڕه‌شی تاوانی حکوومه‌تی سه‌راپا جینایه‌تکاری کۆماری ئیسلامی دڵه گه‌وره و پڕ له هیواکه‌ی تێکۆشه‌ری مه‌زنی گه‌له‌که‌مان، کاک عه‌لی کاشفپوری له لێدان خست.
خه‌می له‌ده‌ستدان و تیرۆری ئه‌و شۆڕشگێره مه‌زنه ئه‌وه‌نده سووک نییه که به تێپه‌ڕ بوونی زه‌مان، تۆزی فه‌رامۆشی له‌سه‌ر بنیشێ و له یاد بچێته‌وه و برینێک نییه، به‌هاسانی سارێژ بێته‌وه.
خه‌می له‌ده‌ست دانی کاک عه‌لی هه‌موو ساڵێک له مانگی گه‌لاوێژدا، له‌گه‌ڵ بانگی له‌دایک بوونی حیزبه‌که‌ی خۆی، دڵ و ده‌روونی هاوڕێیانی خه‌باتکاری داده‌گرێ. سه‌ر به ده‌رگای گشت ماڵێکی ئه‌و کوردستانه‌دا ده‌کات و چیرۆکی دڕنده‌یی ئه‌و ڕژیمه و به‌رخۆدانی پێشمه‌رگه‌کانی گه‌لی کورد بۆ جیله‌کانی داهاتوو ده‌گێڕێته‌وه. ئه‌و خه‌مه ته‌یر و ته‌ته‌رێکی بێقه‌راره، له گوندی هۆوه‌سین هه‌ڵده‌فڕی و سه‌ر له قه‌ڵای بێردوک و به‌ردێزی ده‌دا و به شپیراندا به‌ره‌و چۆمی ئاراس ده‌چێ. ته‌یری خه‌م کاتی گه‌ڕانه‌وه‌ی سڵاو له چێهریق ده‌کا و پاشان له‌سه‌ر چیاکانی ئه‌نزه‌ڵ دا ده‌نیشێ و پشوو هه‌ڵماڵاو به‌ره‌و چیای باڵابه‌رزی بێتکاره له شه‌قه‌ی باڵی ده‌دا، به بۆزی سینادا تێده‌په‌ڕێ و میوانی قه‌ندیلی مه‌ندیل سپی ده‌بێ، ڕوو له دووندی به‌یان و ئاربابا و ئاویه‌ر ده‌کا و له بێستون سترانی” بۆم مه‌رێژن فرمێسکی خه‌م” ده‌چڕێ.
دژواره و گه‌لێک سه‌خته، له‌سه‌ر لاپه‌ڕی په‌رتووک، یادی تێکۆشه‌ری نه‌سره‌وتوو، کاک عه‌لی بکه‌ی. ئه‌و له‌وه به‌رزتر بوو، پێنووس به خامه‌ی چامه‌ی یادی بکاته‌وه. که‌سایه‌تی، خه‌بات، له‌خۆبردویی و فیداکاری کاک عه‌لی زۆر ڕووبارێکی خوڕێن بوو، چه‌شنی فورات به سه‌دان سه‌ده به‌ڕێوه، به‌پێوه بوو. عه‌لی کاشفپور هه‌وێنی خه‌ستی رۆمانی ئه‌و جیله بۆ به‌ره‌ی داهاتوو بوو. سێناریۆ نووسانی فیلمی ژیان، قه‌رزداری ئه‌و ڕۆڵه‌ی قه‌دا پاڵی چیان. ئاسمانی ته‌مه‌ن درێژی کوردستان، گه‌ر به ئه‌ستێره‌کانی شاگه‌شکه بووه، گه‌ر کێڵگه‌ی جوتیار به گوڵه‌گه‌نمی فه‌ریک خووی گرتووه، باره‌گا و ده‌فته‌ری شه‌هیدانی مێژوو، عه‌لی کاشفپوری بۆ نه‌وه‌ی داهاتوو تۆمارکردوه.
کاک عه‌لی روناکبیر بوو، پێشکه‌وتوو و ماموستای ژیان و نه‌ریتی ده‌ڤه‌ری خۆی بوو. زانست و زانیاریی ئه‌و له‌سه‌ر کۆمه‌ڵگای هاوڕه‌گه‌زانی ده‌وروبه‌ری، مایه‌ی پاراستنی هێمنی و هێوری ڕه‌فتار و گوفتاری ئه‌و بوو. کاک عه‌لی به‌دائیم گه‌ره‌کی بوو خواستی ئاڵوگۆڕه‌کانی کۆمه‌ڵایه‌تی فره ئارام و به‌مه‌ندی به‌ره‌وپێش بچن. ئه‌و مافی کوردی ده‌ویست و گه‌لێکی وشیار و چاوکراوه‌ی مه‌به‌ست بوو. هه‌ربۆیه هه‌وڵی ده‌دا له هه‌ر شوێنێک بێ موتاڵا و خوێندن بکا به ئه‌رکی که‌سانی ده‌وروبه‌ر و هاوڕییانی.
کرده‌وه‌کانی کاک عه‌لی پێگه‌یه‌کی به هێزی پڕ له متمانه و بڕۆای بۆ ئه‌و له نێو کۆمه‌ڵگادا سازکردبوو. هه‌ر ئه‌و پێگه به‌رزه سیاسی و کۆمه‌ڵایه‌تییه بوو که کاک عه‌لی کرده چقڵی چاوی دوژمنانی گه‌لی کورد. دوژمن چاوی دیتنی عه‌لی کاشفپوری نه‌بوو و پیلانی کوشتنی ڕۆڵه‌ی کوردی داڕشت. دوژمنی بیر و هزر، شه‌وی 25ی گه‌لاوێژی 1990، ئه‌وکاته‌ی کوردستان سه‌مای خۆشی له‌دایکبوونی حیزبی دێموکراتی ده‌کرد، گه‌یشته سه‌ر موسافیری به‌ره‌و دنیا غه‌ریبی و ژیانی هه‌ژاریشی پێوه ڕه‌وا نه‌دیت و شه‌هیدی کرد.
تیرۆر و شه‌هید کردنی کاک عه‌لی له خانه‌ی ئه‌و تیرۆره ئاگاهانه و به‌به‌رنامانه‌ی کۆماری ئیسلامی دا جێی‌گرت که بۆ سه‌رکرده‌کانی جوڵانه‌وه‌ی ئازادی و سه‌ربه‌ستی و مرۆڤایه‌تی دایڕشتن و به‌ئه‌نجامی گه‌یاندن.
کۆماری ئیسلامی پێیوابوو به تیرۆر و شه‌هید کردنی کاک عه‌لی کاشفپور و گشت خه‌باتکاران، ده‌تۆانێ جوڵانه‌وه‌ی کورد له پێ بخا و تێکۆشانی کورد به‌ره‌و لاوازی و نه‌مان به‌رێ، بێ خه‌به‌ر له‌وه که ئه‌و ته‌نیا توانی به جه‌سته و به‌رواڵه‌ت ئه‌و هاوڕێیانه له کاروانی سه‌رکه‌وتن و نه‌سره‌وتن بستێنێ. دوژمن ده‌بێ ئه‌وه بزانێ، راسته کاک عه‌لی به جه‌سته له نێومان دانه‌ماوه، به‌ڵام بیر و هزری ئه‌و وه‌ک مۆم و مه‌شغه‌ڵێکی به‌بڵێسه بۆ هه‌میشه رووناکی به ڕێگای ڕزگاری گه‌له‌که‌ی ده‌به‌خشێ.
له 20مین ساڵیادی شه‌هید کرانی ئه‌و تێکۆشه‌ره نه‌سره‌وتووه‌ی گه‌له‌که‌ماندا سه‌ری ڕێز و حوڕمه‌ت داده‌نوێنین و سڵاو له یاد و ناو و گه‌وره‌یی کاک عه‌لی کاشفپور ده‌که‌ین.
یادی 20مین ساڵی شه‌هیدبوونی کاک عه‌لی و گشت شه‌هیدانی ڕێگای ئازادی کوردستان به‌رز و پڕشنگدار بێ.
شه‌هاب
15ی ئاگۆستی 2010