٢٤ی گەلاوێژ بەرامبەر بە ١٥ی ئاگوستی ٢٠١٠، بیست ساڵ بە سەر تیرۆری پێشمەرگەی قارەمان و ئەندامی لێوەشاوەی رێبەریی حیزبەکەمان شەهید عەلی کاشف‌پوور بە دەستی تیرۆریستەکانی کۆماری ئیسلامی تێپەڕ دەبێ. بیست ساڵ لەوە پێش لە وەها رۆژێک دا شەهید عەلی کاشف پوور کە بە سەردانێک لە وڵاتی تورکیا بوو، کەوتە بەر هێرشی تیرۆریستەکانی کۆماری ئیسلامی و گیانی لە دەست دا.
عه‌لی کاشفپور ساڵی 1957 له گوندی پیرانجیک له ناوچه‌ی ورمێ له دایک بوو، هێشتا منداڵ بوو کە بنه‌ماڵه‌که‌یان لەو ئاواییە کۆچیان کرد و لە گوندی هۆوه‌سنێ سه‌ر به شاری ورمێ گیرسانەوە.
عەلی خوێندنی سه‌ره‌تایی هه‌ر له‌و گونده ته‌واو کرد و بۆ درێژه‌دانی خوێندن چوو بۆ ورمێ و هه‌تا وه‌رگرتنی دیپلۆم هه‌ر له‌و شارە درێژه‌ی به خوێندن دا. پاش وه‌رگرتنی دیپلۆم له کۆنکووری سه‌رتاسه‌ری به‌شداری کرد و له زانستگای ته‌ورێز له به‌شی کۆمه‌ڵناسی قبووڵ بوو. بەڵام ئەو نەیدەویست لەو بوارەدا خوێندنەکەی درێژە پێبدا و هەر بۆیە دوای ساڵێک سەرلەنوێ به‌شداری کۆنکوری سه‌رتاسه‌ری کرد و له بەشی حقوقی سیاسیی زانستگای تاران وەرگیرا. ماوەی چوار ساڵ بوو کە لە زانستگای تاران درێژەی بە خوێندنەکەی دەدا کە، ساڵی 1978 سه‌رهه‌ڵدانی خه‌ڵکی ئێران دژی رژێمی پاشایەتی ده‌ستی پێکرد. عەلی وه‌ک هه‌موو کوردێکی نیشتیمان په‌روه‌ر که تێکه‌ڵاوی ئێش و ئازاری کۆمه‌ڵانی خه‌ڵک بوو و هه‌ستی به چه‌وسانه‌وه ده‌کرد، زۆر چالاکانه به‌شداری خۆپێشاندانه‌کانی کرد و خه‌ڵکی دژی رژیم هانده‌دا، بەم هۆیەشەوە چه‌ندین جار له لایه‌ن کاربه‌ده‌ستانی ساواک به تاوانی بوونی هه‌ستی کوردایه‌تی و هاندانی خەڵک بۆ بەشداریی لەو خۆپیشاندانانە خرایه نێو سیاچاڵه‌کانی رژیمی گه‌نده‌ڵی پاشایه‌تی. بەڵام عەلی کاشف پوور له‌و که‌سانه بوو که نه ته‌نیا زه‌بر و زه‌نگ و ئازار و ئه‌شکه‌نجه به چۆکی دا نه‌هێنا، به‌ڵکوو ئه‌و ئازار و ئه‌شکه‌نجانه بوونه هه‌وێنی خۆراگری و به‌ربه‌ره‌کانی له به‌رامبه‌ر دەسەڵاتی پاشایەتی و دەزگا سەرکوتکەرەکەی ساواک.
به دوای رووخانی رژیمی پاشایه‌تی، کاک عه‌لی کاشفپور وه‌ک هه‌موو تێکۆشه‌ر و کوردێکی دڵسۆز و به له به‌رچاو گرتنی ئه‌و هه‌موو زوڵم و زۆرێی که له زه‌مانی ده‌سه‌ڵاتداری شا و ساواک به سه‌ر کوردیان هێنابوو، بڕیاری دا که بۆ درێژه دان به خه‌بات و وه‌ده‌ست هێنانی ماڤی ره‌وای گه‌له‌که‌ی و رزگاری کورد له چه‌وسانه‌وه ببێته ئه‌ندامی حیزبی دیمۆکراتی کوردستان. ساڵی 1978 وه‌ک زۆربه‌ی شۆڕشگێڕانی کورد لیباسی پیرۆزی پێشمه‌رگایه‌تی له‌به‌ر کرد و به هەموو تواناوە هه‌وڵی بۆ وەدیهاتنی ئامانجەکانی خۆی و گەلەکەی لە ریزەکانی ئەم حیزبەدا دەست پێکرد. له‌و رێگایه‌ش دا به شاهیدی هه‌موو ئەوانەی دەیانناسی یه‌کێک له باشترین، به ئه‌مه‌گترین، دڵسۆزترین و سادقترین ئه‌ندامی حیزب بوو له ناوچه‌ی ورمێ و له نێو کۆمه‌ڵانی خه‌ڵکیش دا به خۆشنێو و تێکۆشه‌رێکی دڵسۆزی کورد نێو بانگی ده‌رکرد و بوو به جێگای باوه‌ر و متمانه‌ی خه‌ڵک. زۆربه‌ی کێشه کۆمه‌ڵایه‌تی و ناوخۆیه‌کانی خەڵکی ناوچەکەی به بیر و هزرێکی شۆڕشگیڕانه‌وه چاره‌سه‌ر ده‌کرد. کاک عه‌لی له ماوه‌یه‌کی کورت دا توانی کۆمه‌ڵێکی به‌رچاو له خه‌ڵکی ناوچه بێنێته نێو رێزی حیزبی دیمکراتی کوردستان و هه‌ستی شۆڕشگێڕی و نیشتیمانپه‌روه‌ری له نێو خه‌ڵک دا په‌ره پێ بدا .
کاک عه‌لی کاشفپور، سه‌ره‌ڕای ئەوه‌ی که له باری سیاسیەوه کادرێکی به ئه‌زموون و لێهاتوو بوو، پێشمه‌رگه‌یه‌کی قاره‌مانی مه‌یدانه‌کانی شه‌ڕ به دژی دوژمنانی ئازادی و کۆنه‌په‌ره‌ستی بوو. ئەو هیچ کات ئیجازه‌ی به خۆی نه‌ده‌دا مه‌سئولییه‌ت به‌رچاوی بگرێ و به شێوه‌یه‌کی غه‌ڵه‌ت که‌ڵکی لێوه‌ربگرێ. هه‌میشه خۆی به چووکترین پێشمه‌رگه و خزمه‌تگوزاری خه‌ڵک و پێشمه‌رگه داده‌نا. هه‌ر ئه‌و ئاکار و کرده‌وه به‌رزانە بوو کە هیمایه‌کی شۆڕشگێڕانه‌ی به کاک عه‌لی به‌خشیبوو و هه‌موو که‌س له گه‌وره و چووکه‌وه رێز و ئیحتڕامی تایبه‌تیان بۆ داده‌نا.
ساڵی 1979 له کۆنگره‌ی چواری حیزبی دێموکراتی کوردستان که له شاری مه‌هاباد به‌ڕێوه چوو، کاک عه‌لی به هۆی لێهاتوویی و لێزانی و هه‌ست و بیری شۆرشگێڕانه‌ی، بە ئەندامی جێگری کومیته‌ی ناوه‌ندی هەڵبژێردرا. دوای گه‌ڕانه‌وه‌ی بۆ ناوچه‌ی شیمالی کوردستان چالاکانه‌تر له جاران کار و ئه‌رکه‌کانی پێ‌ئه‌سپێردراوی کۆنگره‌ی 4ی به‌وپه‌ڕی ئیمان و له‌خۆبوردوویه‌وه به‌ڕێوه ده‌برد و رۆژ لە دوای رۆژ تێکۆشانی حیزب له ناوچه‌که دا په‌ره‌ی ده‌ستاند. هەربۆیەش داگیرکه‌رانی کوردستان بە هەموو شێوەیەکی لێی دەخەفتان تا زەفەری پێبەرن. کاتێک شەهید عەلی کاشف پوور و هاوڕێکانی لە گوندی “ئاخچە قەلعە”ی وەرمێ مابوونەوە، فرۆکه بۆمب هاوێژه‌کانی دوژمن عەلی و هاوڕێکانی بۆردمان کرد و لە ئەنجام دا کاک عه‌لی کاشفپور بریندار بوو. به‌ڵام به خۆشێوه زۆری نه‌خایاند که برینه‌که‌ی چاک بۆوه و نه‌ته‌نیا وره‌ی دانه‌به‌زی، به‌ڵکوو دڵخۆشکه‌ر و هانده‌ری کادر و پێشمه‌رگه‌کانیش بوو که له سه‌ر کاره‌کانی خۆیان سوور بن و ئه‌رکه‌کانی خۆیان به باشی به‌ڕێوه به‌رن. ساڵی 1981 له کۆنگره‌ی پێنجی حیزبی دێموکراتی کوردستان دا کاک عه‌لی به کومیته‌ی ناوه‌ندی هەڵبژێردرا و به‌رپرسایه‌تی فێرگه‌ی سیاسی حیزبی له ناوچه‌ی ورمێی پێ ئه‌سپێردرا. ئەو زۆر به باشی ئەرکی پێ ئەسپێردراوی خۆی به‌ڕێوه ده‌برد و زۆر که‌س له ژێر چاوه‌دێری و مامۆستایەتی ئەو دا په‌روه‌رده بوون و له نێو حیزب دا پێگه‌یشتن. کاک عه‌لی ساڵی 1987 له لایه‌ن حیزبه‌وه ناردرا بۆ فه‌رانسه و بۆ ماوه‌ی مانگێک له‌وێ مایەوە. ئەو که قاڵبووی کووره‌ی خه‌بات و به‌ربه‌ره‌کانی لەگەڵ زوڵم و زۆر و چه‌وسانه‌وه بوو، له فه‌رانسه‌ش وچانی نه‌داو له خۆپێشاندانه‌کانی دژی رژیمی کۆماری ئیسلامی چالاکانە به‌شداری دەکرد. بەڵام لە سەر پێداگریی خۆی هەر زوو گەڕایەوە بۆ کوردستان و بۆ ناو کۆڕی هاوڕێیانی. ئەو زۆر جار لە بابەت ئەو سەفەرە و گەڕانەوەکەی ده‌یگووت: بستێک خاکی کوردستان، هه‌موو ئوروپا دێنێ و ژیانی پێشمه‌رگایه‌تیش، گه‌وره‌ترین شانازییه که به نسیبی هه‌موو که‌س نابێ.
کاک عه‌لی کاشفپور پاش لێکترازانی ریزەکانی حیزبەکەمان لە دوای کۆنگرەی هەشت، لە ریزەکانی حیزبی دێموکراتی کوردستانی ئێران – رێبەرایەتیی شۆرشگێڕی ئەو کات دا درێژەی بە کار و تێکۆشانی سیاسی و حیزبی خۆی دا و سەرلەنوێ به‌رپرسی شیمالی کوردستانی وەئەستۆ گرتەوە و هه‌ر وه‌ک جاران به ئیمانه‌وه درێژه‌ی به کار و باری سیاسی و نیزامی له ناوچه دا. ساڵی 1990 بنەماڵەکەی کە ماوەیەک بوو ئاوارەی وڵاتی تورکیا ببوون، تووشی گرفتی بنەماڵەیی بوونەوە و رێبه‌رایه‌تی حیزب داوای لێکرد که به هانای بنه‌ماڵه‌که‌یه‌وه بچێ و له‌و گرفته رزگاریان بکا. شەهید عەلی ئەگەرچی رازی نه‌ده‌بوو هاوڕێکانی به جێ بێڵێ به‌ڵام لە سەر پێداگریی حیزب بڕیاری دا که بچێ و رزگاریان بکا و به زوویی بگه‌ڕێته‌وه. دوای ماوه‌یه‌ک که دوژمنی به‌دفه‌ڕ هه‌میشه له هه‌لێک ده‌گه‌ڕێ بۆ زه‌ربه وه‌شاندن للە قارەمانانی کورد، به هۆی جاش و سیخوڕه‌کانیەوه لە بوونی عەلی ئاگادار دەبێ. به‌داخه‌وه شه‌وی 1990.08.16 له شاری قۆنیه 3 که‌س به جل و به‌رگی پۆلیسی تورکیا ده‌چنه ماڵه کاک عه‌لی و به زۆر له ماڵی دێننه ده‌ر و له پێش چاوی ژن و منداڵی به لێدان و راکێشان ده‌گه‌ڵ خۆیان ده‌یبه‌ن. دوای ماوه‌یه‌ک به ده‌ست و چاوی به‌ستراوی و لە حاڵیکدا کە له‌شی له ژێر شکه‌نجه‌و ئازار دا شێوا بوو، تەرمەکەی له سه‌ر جاده‌ی قۆنیه – ئانکارا دۆزرایەوە. ئه‌و کرده‌وه دڕندانه‌یه کە له لایه‌ن تیرۆریستانی کۆماری ئیسلامی ئێران و بێگومان به هاوکاری میتی تورکی به‌ڕێوه چوو، خه‌سارێکی گه‌وره بوو له جووڵانه‌وەی کورد به تایبه‌تی شیمالی کوردستان.
سڵاو یاد و بیره‌وه‌ریی شه‌هیدی رێگای رزگاریی کوردستان شەهید عەلی کاشف پوور و هەموو شەهیدانی کوردستان
———————–
بیوگرافی شەهید عەلی لە ماڵپەڕی شەهیدانی حیزبی دێموکراتی کوردستان وەرگیراوە.